Þörfin fyrir breytingar þarf að vera öllum ljós

Fyrsta skrefið að árangursríkum breytingum er að sýna fram á nauðsyn þeirra og fá starfsfólk til að sjá og finna raunverulega þörf fyrir breytingar. En af hverju að einblína á þörfina? Í Sense of Urgency heldur John Kotter því fram að án þarfarinnar séu breytingar dæmdar til að mistakast frá upphafi. Raunveruleg þörf heldur fólki ákveðnu í að halda áfram og sigra, núna. Starfsmenn mæta til vinnu daglega staðráðnir í því að áorka einhverju mikilvægu og sinna ekki óþarfa verkefnum til að vinna hraðar og af meiri árangri enda sjá þær tækifærin sem breytingarnar hafa í för með sér. A Sense of Urgency er eftir John Kotter sem er þekktur fyrir bækur sínar, Leading Change, Heart of Change og Our Iceberg is Melting sem fjalla allar um árangursríka breytingastjórnun. 

Ástæður hamfaranna

Hamfaraástand ríkir nú á alþjóðlegum fjármálamörkuðum vegna undirmálslána í Bandaríkjunum. Hvað gerðist nákvæmlega, hvernig gat þetta gert og síðast en ekki síst, hvernig getum við komið í veg fyrir að þetta gerist aftur? Mark Zandi svarar öllum þessum spurningum í nýrri bók sinni, Financial Shock á skipulagðan, nákvæman og einfaldan hátt. Zandi byrjar á því að greina helstu ástæðurnar, t.d. hvers vegna fólk vill eignast íbúðarhúsnæði og hvaða mistök Alan Greenspan gerði. Einnig fjallar Financial Shock um hvernig netið breytti lánamarkaðnum þannig að óábyrgir lánendur gátu vaxið hratt á kostnað þeirra ábyrgu. Í bókinni er einnig ráð fyrir fjárfesta, til að koma auga á vaxandi bólur, stjórnvöld, sem verða að hafa meiri yfirsýn og almenning, sem verður að lifa af næstu ár.

Veröldin er sveigð

Hvernig olli tiltölulega lítið vandamál í íbúðalánum í Bandaríkjunum nánast hruni í fjármálakerfi heimsins? Í The World is Curved er framangreindri spurningu svarað og bent á þau vandamál sem hafa komið upp á yfirborðið í kjölfarið. Einnig er því lýst hversu mikil áhætta felst í umhverfinu sem við búum í núna og hvers vegna lán koma til með að verða vandamál framtíðarinnar. Fjármálakerfi alheimsins hefur skapað hjarðhegðun sem gæti haft mjög alvarleg áhrif á alla, ekki eingöngu Wall Street. Bókin lýsir nýrri heimsmynd í fjármálmálum og hvers vegna Tony Soprano hefur áhrif í Kína, hvernig húsmæður í Japan hafa tekið stjórnina í fjármagnsflæði landsins og hvernig erlendir sjóðir frá Kína, Rússlandi, Sádi Arabíu og Dubai eru slæmir en við getum ekki lifað með þeim né án.

Hvað getum við lært af kreppunni 1907?

Kreppan árið 1907 og sú kreppa sem við göngum í gegnum núna eiga margt sameiginlegt og þess vegna hefur bókin The Panic of 1907 náð miklum vinsældum um þessar mundir. Mikil tengsl milli fjármálafyrirtækja varð til þess að vandamál eins varð vandamál allra. Lána- og lausafjárkrísa lét á sér kræla og Wall Street var uppruni alls ills í hugum margra.

Kreppur krufðar

Sagan getur alltaf kennt okkur eitthvað og í þessari sögulegu upprifjun á fjármálakreppum gefst okkur tækifæri til læra af fyrri kreppum. Í Manias, Panics and Crashes er því lýst hvernig óstjórn peninga og lána hefur leitt til fjármálalegs hruns í gegnum aldirnar. Í þessari bók er sagt frá fasteignabólunni í Sviþjóð, Noregi og Finnalandi í lok níunda áratugarins. Manias, Panics and Crashes segir einnig frá eignabólunni sem myndaðist milli 1985 og 2000 í Japan og öðrum löndum Asíu að ógleymdri netbólunni um 2000.

Svo komum við að endalokunum

 Then We Came to the End fjallar um líf á auglýsingastofu þar sem mórallinn er ekki upp á sitt besta og samstarfsfélagarnir eru misjafnlega skemmtilegir. Einn þykist alltaf vita allt best, öðrum var veitt stöðuhækkun og stjórnar því með harðri hendi en rekstur stofunnar gengur ekki eins og skyldi. Flestum virðist standa á sama þar til einum starfsmanni er sagt upp og allir átta sig á því að þeir gætu verið næstir. Skemmtileg og fyndin skáldsaga um lífið á vinnustaðnum sem virðist í grunninn alltaf lúta sömu lögmálum.

Blekkingarvefur afhjúpaður

Árið 2002 útskýrði David Einhorn, forstjóri vogunarsjóðsins Greenlight Capital opinberlega hvers vegna hann hefði veðjað á að hlutabréf í Allied Capital myndu lækka, þ.e. tekið svokallaða skortstöðu og upphófst þá atburðarás sem ekki sér enn fyrir endann á. Til að byrja með reyndi Allied svokallað spunastríð gagnvart Einhorn og m.a. skoðaði Fjármálaeftirlit Bandaríkjanna hvort Einhorn væri að reyna að hafa ólögleg áhrif á verðmyndun í Allied Capital. En eins og Einhorn bendir á í Fooling Some of the People, All of the Time voru skjöl Einhorn sem staðfestu orð hans ekki skoðuð. Sex árum og mörgum yfirheyrslum síðar heldur Einhorn því enn fram að Allied Capital stundi ekki heiðarleg viðskipti og gagnrýnir hann bæði regluverkið, stjórnmálamenn, fjölmiðlamenn og fjármálamarkaði fyrir að láta lygar viðgangast. Mjög góð lesning sem á vel við núna.

Náðu forskoti með því að starfa erlendis

Hvernig eiga konur að verða eftirsóknarverðari starfskraftur? Svarið er einfalt, með því að öðlast reynslu á alþjóðlegum vinnumarkaði. Í Get Ahead by Getting Abroad lærirðu aðferðir við að fá störf erlendis, ná árangri í því starfi og að njóta lífsins á nýjum slóðum.  Alþjóðleg reynsla skiptir sífellt meira máli þar sem landamæri skipta litlu máli í starfsemi fyrirtækja.

Njóttu lífsins meira með því að eyða minna

Praktískur og skemmtilegur leiðarvísir um það hvernig á njóta lífsins meira með því að eyða minna. Veraldleg gæði gerðu þig svalan einu sinni en það er svo 2007. Í Ultimate Cheapskate´s Road Map to True Riches eru leiðbeiningar um hvernig á að kaupa minna og vera laus við áhyggjur af persónulegum fjármálum og á sama tíma að hafa betri áhrif á aðra í kringum þig og vera umhverfisvænni. The Ultimate Cheapskate´s Road Map to True Riches segir frá aðferðunum og lögmálunum sem gera ódýrt svalt.

Hvernig á að vera happasæll á komandi árum?

Eflaust eru margir sem velta fyrir sér þeirri spurningu hvernig eigi að vera happasæll á komandi árum og í How to Prosper During the Coming Bad Years in the 21st Century svarar Howard J. Ruff þeirri spurningu. Ruff heldur því fram að þeir þættir sem leiddu til „stagflation“ eða samdrætti samhliða verðbólgu í kringum 1980 séu nú til staðar. Bókin kom út fyrr á árinu og er í raun endurbætt útgáfa af bókinni How to Prosper During the Coming Bad Years sem var gefin út árið 1978. Þá mælti Ruff með fjárfestingum í gulli og silfri og einnig nú og sýnir hann hér frammá hversu árangursríkar ráðleggingar hans voru á sínum tíma.