Mér var sagt upp – hvað svo?

Burning the Suit fjallar um þá krísu sem fólk getur lent í þegar því er sagt upp. Höfundurinn, Andrew Taylor, byggir bókina á eigin reynslu og fléttar við hana frásögn annarra sem hafa lent í sömu sporum.  Andrew Taylor gekk í gegnum krísu þegar honum var sagt upp eftir 16 ára starf hjá sama fyrirtækinu og eitt af því sem hann tók sér fyrir hendur var að skrifa dálk sem fjallaði um hvaða áhrif uppsagnir hafa á fólk. Skilaboð bókarinnar eru að það á að líta á uppsagnir sem upphafið að einhverju spennandi þrátt fyrir að oft sé erfitt að koma auga á tækifærin við þessar aðstæður.  

The Three Tensions

The three tensions segir frá hvernig velja eigi réttar áherslur í rekstri, þ.e. hvaða þætti á að leggja meiri áherslu á en aðra og hvað sé til ráða. Spurningum á borð við hvort arðsemi sé mikilvægari en vöxtur og hvort langtímasjónarmið séu mikilvægari en skammtímasjónarmið er svarað í The Three Tensions. Höfundar bókarinnar, Dominic Dodd og Ken Favaro hafa yfir 40 ára reynslu af að vinna fyrir mörg af fremstu fyrirtækjum heims og unni þeir bókina út frá gögnum frá yfir eitt þúsund fyrirtækjum. Að auki byggja þeir bókina á ítarlegum viðtölum við stjórnarformenn og forstjóra yfir 20 stórfyrirtækja á borð við Alcan, Xerox, Reuters og Roche.

Made to Stick

Made to Stick fjallar um hvernig og hvers vegna sumar hugmyndir skila árangri en aðrar eiga aldrei möguleika. Made to Stick gengur út frá því að það séu sex atriði sem skilji góðar hugmyndir frá verri. Þessi sex atriði eru: einfaldleiki, komi á óvart, sé gegnheil, hafa trúverðugleika, vekji upp tilfinningar hjá fólki og sé góð saga.

Made to Stick hentar öllum þeim sem þurfa að koma einhverjum skoðunum og hugmyndum á framfæri því það er eitt að hafa hugmynd og allt annað að fá fólk til að breyta hugsunarhætti eða venjum í samræmi við þessar nýju skoðanir eða hugmyndir og Made to Stick kemur lesandanum langt. 

Tribal Business School

Tribal Business School tengir saman lífsbaráttu 80 frumstæðra ættbálka og baráttu fyrirtækja við að komast af. Jo Owen, höfundur bókarinnar, heimsótti yfir 80 ættbálka víðs vegar um heiminn og komst að því hvaða eiginleikar í fari þessara ættbálka hefur orðið til þess að þeir hafi lifað af og heimfærir á fyrirtæki nútímans. Fyrirtæki og stjórnendur geta lært mikið af því að tileinka sér þessar oft á tíðum einföldu en skynsömu leikreglur. Leyndardómar ættbálkana ögra viðurkenndum skoðunum um lífsbaráttu fyrirtækja, hvað skili árangri og hvað sé framúrskarandi á mjög nýstárlegan hátt.

Sæt saga súkkulaðsins

Cadbury´s Purple Reign segir frá því hvernig Cadbury hefur tekist að skapa sterkt alþjóðlegt vörumerki með mikilli þrauseigju í bland við nýsköpun og aðlögun. Cadbury er markaðsleiðandi í sölu súkkulaðis í Bretlandi í dag og var stofnað upp úr 1830. Rekstur Cadbury hefur ekki alltaf gengið eins og í sögu eins sagt er heiðarlega frá í bókinni og að auki eru greinargóðar lýsingar á hvernig félagið keppir á mismunandi mörkuðum.  Bókin er skreytt auglýsingum frá Cadbury og gleðja augu þeirra sem hafa áhuga á markaðssetingu, stýringu vörumerkja og ekki síst þeim sem áhuga hafa á góðu súkkulaði.

Konur - drifkraftur næstu efnahagsbyltingar

Why women mean business segir frá hversu mikilvægt það er fyrir viðskiptalífið að viðurkenna konur sem stjórnendur og veita þeim jöfn tækifæri á við karla. Samkvæmt bókinni verða konur drifkraftur næstu efnhagsbyltingar en slíkt gerist ekki fyrr en það verður almennt viðurkennt að konur eru jafnar körlum án þess að vera eins og karlar. Bókin útskýrir muninn á körlum og konum og hvernig fyrirtæki ná fram meiri framleiðni með því að nýta hæfileika kvenna til hins ýtrasta. Þessi kraftmikla nýja bók segir frá þeim fjölmörgu tækifærum sem fyrirtæki standa frammi fyrir ef þau raunverulega átta sig á og hegða sér í samræmi við þann drifkraft sem konur geta verið í viðskiptalífinu.

Naked conversations

Mér fannst við hæfi að byrja umfjöllunina um bækur og annan fróðleik á Naked Conversations þar sem sú bók fjallar um hversu gott tól bloggið er til að koma skilaboðum á framfæri. Naked conversations fjallar á áhugaverðan hátt um hvernig bloggið breytir samskiptum milli fyrirtækja og viðskiptavina þeirra og hvernig fyrirtæki geta nýtt sér þessa nýju samskiptaleið til að bæta ímynd sína. Bókin segir frá raunverulegri reynslu marga mismunandi fyrirtækja og einstaklinga og bæði kostum og göllum bloggsins sem samskiptaleiðar í viðskiptalífinu. Hvatinn að bloggi í viðskiptalífinu er sá að viðskiptavinir vilja getað tjá sig og sagt sína skoðun í stað þess að lesa fréttatilkynningar frá fyrirtækjunum sjálfum því eins og kemur fram í bókinni snúast viðskipti fyrst og fremst um samskipti fyrirtækja við viðskiptavini og aðra hagmunaaðila.